মনোৰম খেল
হাতত সাৰে ভৰিত সাৰে
বাঢ়ি আহে খোজবোৰ৷
পিটনি খচকি
পানীমেটেকা ভাঙি৷
অৰণ্য চৌচিৰা কৰি
এৰাসুঁতিৰ ভঙা সাঁকোৰে৷
পঁজালবোৰ গোপনে বাঢ়ি আহে
এন্ধাৰৰ দেৱাল বগাই চুঁচৰি চুঁচৰি...
এচামে পথ দেখুৱায়
এচাম সতৰ্ক হয়৷
তেতিয়াই ভোক লাগে জে চি বিৰ
হিলদ’ল ভাঙি আগুৱায়...
এক্সকেভেটৰে গোঁজৰে
মূছকঁছ যায় থিয়দঙা দিয়া ঠিকনা৷
পোহৰে এঙামুৰি দিলেই
হৰলুকি হয় ঠিকনা৷
এন্ধাৰে চামিয়ানা তৰিলেই গজি উঠে
অচিনাকি চিনাকি খোজবোৰ৷
পলকতে এটা চুবুৰি, পলকতে এখন গাঁও
ছানি ধৰে অৰণ্য পথাৰ ছন পৰা মাটি, যেন কাকতিফৰিং
সহনশক্তি হেৰুৱাই জে চি বিয়ে দাঁত কৰছে
ঘৰবোৰ মূছকঁছ যায়, ঠিকনাবোৰ হেৰায়
দিনত হেৰায়, ৰাতি গজে
ৰাতি গজে দিনত হেৰায়
সময় সুবিধাৰ স’তে মিলিজুলি
চলি থাকে এই মনোৰম খেল...
An English translation of the poem.
